Boere het in die tyd van die Groot
Trek hulle hier kom vestig. In 1896 met die uitbreek
van die runderpes het die boere weggetrek van die
Oranje rivier en hulle 10km wes van die rivier gevestig.
Hier is ‘n put gegrawe wat aan hulle en hulle
vee water moes gee. Om die put het ‘n gemeenskap
ontstaan met ‘n skool en ‘n onderwyser
uit die Kaap.
Die omgewing is baie ryk aan voëllewe.
Die hoë berge en klowe is die tuiste van 2 broeipare
witkruisarende. Swerms (tot 1000) sandpatryse is soggens
en saans sigbaar by hul watergate. Hierdie is ook
die tuiste van die grootste vlieënde voël
op aarde; die gompou. Die baie bekende versamelvoëlneste
wat so groot is dat dit selfs ‘n hele boom kan
verswelg is ook volop. Vele meer soos volstruise,
wilde ganse, korhane, ludwig-se-pou en ander kleiner
voëls is ook te sien.
Kom besoek ons en ervaar die daaglikse
werkswyse van die tradisionele veeplaas. Kom kyk hoe
die boklammers drink, hoe daar gemelk word en as jy
‘n ruiter is, het jy die geleentheid om saam
te gaan as daar skape bymekaar gemaak word of sommer
net ‘n lekker lang rit in die veld!
Indien jy graag jou staal met jou
4 x 4 wil kom toets, kan jy dit ook doen! Met +160km
pad op 10 000 hektaar het jy die geleentheid om elke
dag ‘n nuwe roete te ry! Dit wissel van maklik
tot uiters moeilik! Enkel roetes wissel tussen 4 en
60km. Op die roetes is ‘n verskeidenheid braai
en kampplekke. Skakel gerus vir Chris vir meer inligting.
GERIEWE
Chalet
Ten volle toegeruste chalet vir ‘n gesin van
4. Hier doen ons dit op die tradisionele manier: lanternlig
en ‘n “donkie” vir warm water. Dus,
geen elektrisiteit!
Kampering met ablusiegeriewe
Daar is 4 kampeerplekke met braaigeriewe en gesamentlike
stort-, toilet en opwasgeriewe. Elke kampplek is geleë
onder ‘n lieflike ou groot boom. Ons voorsien
ook vuurmaakhout.
Kampering sonder ablusie
Hierdie kampplekke is vir jou wat alles het, en dit
saamry! Jy het die geleentheid om in die ongeskonde
natuur te kom tent opslaan. Pragtige klowe en sonsondergange
sal jou begroet. Ons voorsien aan jou ‘n groot
boom, vuurmaakhout, braaiplek en water.
Die beste tyd om ons te besoek is tussen Maart en
November.
